The Colors of Mongolia

"Монгол сайхаан-2006" аялалын зургуудаас түүвэрлэн 108 газар авсан 200 гаруй зургаар гэрэл зургийн CD гаргаж байна.
CD 2007 оны 6 сарын 1-нд бэлэн болох ба одооноос урьдчилан захиалж болно. Та урьдчилан захиалсанаар 30%-ийн хөнгөлөлт эдлэх болно. Монголд үнэгүй хүргэж өгнө. Захиалгаа өгөхдөө дээрх CD-ний нүүрний зурган дээр дарна.

Монголчууд ямар зургийн аппарат хэрэглэдэг вэ

Та ямар зургийн аппараттай вэ? санал асуулгыг 2 сар шахам хугацаанд явууллаа. Хэдийгээр олон хүн оролцоогүй боловч зургийн аппарат үйлдвэрлэгчдийн дэлхийн зах зээлд эзлэх хувьд дөхөж очиж байгаа тул энэ статистик ойролцоо юм байна гэж үзэв. Гэхдээ энэ санал асуулгыг цаашид нилээд үргэлжлүүлэн явуулах болно. саналаа өгөөрэй. Монголчуудын 51% (дэлхийн зах зээлд 47%) нь Canon зургийн аппараттай юм байна. Nikon 27% (дэлхийн зэх зээлд 34%) эзэлж байна. Ийм болохоор би цаашдаа блог дээрээ зургийн тухай пост тавихдаа Canon, Nikon аппаратууд дээр жишээ авч бичиж байх болно.

Photo CD-ний нэр

Миний гэрэл зургийн CD гаргахад хамгийн чухал хэсэг болох CD-ний нэр сонгоход гүн туслалцаа үзүүлж, намайг дэмжсэн блог уншигч та бүхэндээ баярлалаа. CD-ний нэрийг англиар The Colors of Mongolia гэж нэрлэхээр боллоо. Энэ нэрээр зөвхөн энэ CD-г ч биш цуврал CD-ны нэр болгохоор шийдэв. CD-ний нэрийг Photos of 108 moments гэж нэрлэсэн. Энэ CD-нд "Монгол сайхаан-2006" аялалын явцад авсан 108 газар авсан 200 гаруй зураг орж байгаа. Миний энэ CD 6-р сарын нэгэнд худалдаанд гарах ба урьдчилсан захиалга авах, худалдан авах хаягийг удахгүй блог дээрээ байрлуулах болно.

Танихгүй танил буюу Цоодолын Хулан

Олоон жилийн өмнө гудамжинд европ хувцастай годгоносон цагаан охинтой таарсан. Тун удалгүй дөрвөн талтай малгайтай, монгол дээл өмссөн намбалаг монгол эмэгтэйтэй тэр үеийнхээр бол зоос гоёлын хажууд дахин таарсан юм. Хааяа шүлэг уншихийг зурагтаар хардаг. Сонгуулийн үеэр зурагтаар дахиад харсан. Миний мэдэх Хулан ингээд дуусч байна. Саяхан түүний "Зүгээр л нэг амьдрахсан" номыг уншлаа. Та ч бас уншаарай. Энэ номыг та шүлгийн түүвэр гэж битгий бодоорой. Блогч биднийхээр бол бүх блогоос сайхан болгоныг нь түүгээд нэг ном гаргачихсан юм шиг. Сайхан бичлэгүүдийг шүлгээрээ гоёжээ. Сайхан сэтгэлтэй, монголын төлөө гэсэн сайхан бодолтой эмэгтэй юм байна.
Энэ залуухан бүсгүй хичнээн их юм хийсэн юм бэ? Сонин түүнийг хичнээн их зовоосон юм бэ? Хөгшин, залуу, эрэгтэй эмэгтэй гэхгүйгээр хичнээн олон хүнтэй найз юм бэ? Бахархмаар тууштай, өөрийн үзэлдээ үнэнч явжээ. Хүн ийм байх ёстой юм шиг.
Түүний номыг уншиж байхад номыг нь олон хүн уншаасай, уншигчдын дотор нь түшмэлүүд бас байгаасай гэсэндээ энэ блогийг бичлээ.

Ц.Хуланд зүгээр л нэг амьдарч болохгүй байгаа энэ үед зүгээр л хэсэг амьдраад зөндөө ихийг бүтээхийг хүсэн ерөөе.