Монгол наадам

Монголын наадам Юнеско-д бүртгэгдлээ гээд Дэмбэрэл юм үзээгүй юм болохоор баярлаж л байна лээ гэдэг шиг хөөрцөглөөд байсан. Хамгаалахаас өөр аргагүй болж устах аюул тулчихсан юм байна.

Бөхийн дүрэм нь зайлуул нэр төдий юм байна. Зөрчсөн ч болно. Дагасан ч болно. Зурагтаар дүрмээ уншаад байхад л зөрчсөнийг нь давуулаад явуулчихна. Эсвэл дүрмээ мөрддөг, эсвэл дүрэмгүй болговол таарна

Шодоо, шодооны шүүгч, шодоочин гээд их л эротик нэртээ ажил байх юм. Ядаж шодолт, шодогч гэж болдоггүй болоод л тэгдэг байх даа

Бөхчүүдийн ёс суртхууныг сайжруулмаар юм. Нөгөө засуул нэртэй малгайны өлгүүрээ айлгадаг бололтой юм. Ерөнхий сайд, ерөнхийлөгч нар урьж ирсэн хүмүүсээ ичиж л суусан байхдаа. ЮНЕСКО-д бүртгэж авсан хүн үзэж суудаг. Нүүр улаймаар юм.

Засуулгүй байсан ч болохоор. Нөгөө муу малгай баригч будлиан гарахаар шийдэж чадахгүй, бичлэг үзээд ч нэмэргүй. Ядаж байхад том биетэй, навсайсан томдсон дээлтэй юмнууд байхийм. Олуулаа байхыг нь яана. Зурагт хаагаад бичлэг хийлгэхгүй. Шийдвэр гаргаж чадахгүй, бөхийн өөдөөс үг хэлээд тоохгүй юм чинь ядаж туранхай хүмүүс байвал зурагтынханд төвөг багатай баймаар.

Морь цоллохдоо дарга нарт харуулах гээд нэг мухарт аваачаад цааш харуулаад зогсоочих юм. зураг авах арга байхгүй. Дарга нарын индэрт ойртуулахгүй. Тэгээд хойноос нь харсан бичлэг гаргана. Талбайн голд цолловол мөнгө төлдөггүй цөөхөн дарга биш ядаж наадмын талбайд цугласан мөнгөө төлсөн хүмүүсийн хагас нь үзэх юм.

Хурдан морины уралдааныг машин дотроос, гар дээрээс нэг бүрсийсэн, савласан юм л харуулаад байх юм. Хурдан морьны уралдааныг км тутамд камера тавиад бичихэд наадмын төсвийн мөнгө хүрэхгүй гэхээргүй дээ. Машины уралдааныг тэгээд харуулж болж байгаа юм чинь.

Сур харвааны тухай дөнгөж мэдээ төдий юм харуулдаг болохоор санал хэлэх юм алга.

Эрүүлээр сэтгэ-3. Чөлөөт цаг

Залуучуудын чөлөөт цагаа өнгөрөөх газар байхгүй юм чинь

бааранд ордог гэж оюутан бүсгүй зурагтаар ярихад сонсоод уурлаж бичсэн пост

Цаг яаж өнгөрөөе дөө гээд явж байдаг хайран залуу нас. "Тууврын замд" киноны усанд боогдсон хүмүүс шиг хийх ажил байхгүй, явах газар байхгүй байдалд орохыг чөлөөт цаг гэдэг юм болов уу.

Танд цаг байхад байтугай байхгүй байхад цаг гаргах зүйлс бий.

Толгойгоо нэг сайхан амраая гээд бааранд суух, зүгээр суух зэрэг нь толгой амраах нь юу л бол. Тогтонги ус өмхийрдэг гэдэг шүү дээ. Шинэ зүйл бодох, сэтгэх нь таны ирээдүйг өөрчлөх тул ЧӨЛӨӨТ ЦАГ танд байвал БОД, СЭТГЭ, УНШ, ХӨДӨЛМӨРЛӨ

Гэгээрсэн хүн жаргал зовлон, хүсэл, шунал гээд хүний орчлонгийн зүйлсийг мэдрэхээ больдог юм гэнэ лээ. Гэгээрсэн хүн харсан амьд хүн алга. Бас гэгээрсэн амьд хүн ч алга. Бид бүгд гэрээрэх нь юу л бол. Тийм болохоор эхний бодож, сэтгэх, унших, хөдөлмөрлөхөд бүх чөлөөт цагаа битгий зар. Гэгээрсэн бурхан болохгүй хүний амьдарлаар амьдрах тул ЧӨЛӨӨТ ЦАГ танд байвал одоо та туслаж чадах хүмүүст ТУСЛА, ДЭМЖ. НАЙЗ НӨХӨДТЭЙ БОЛ. Таны тус хэрэггүй хүмүүст бүү дольгино.

Найз нөхдийн тус дэмжлэг сайхан. Аав, ээж, ах, дүүгийн тусламж дэмжлэг ч их. Гэхдээ тэд цаанаа амьдралтай. Үргэлж туслаад дэмжээд явна гэж юу л бол. ЧӨЛӨӨТ ЦАГ танд байвал Үхтэл хамт жаргах, зовох ханиа ХАЙРЛА, ЖАРГАА, байхгүй бол ХАЙЖ ОЛ.

Эрүүл бие байхгүй бол их мөнгө, эрдэм мэдлэгээр ч бас яах билээ. Эмийг орлох хөдөлгөөн их бий, харин хөдөлгөөн орлох эм гэж огт байхгүй. Тэрч сайн, энэ ч сайн гээд атга атгаар эм уугаад явдаг баян, бандгар хүн их байх юм. Ирээдүйд та жаргаж явахад эрүүл бие хэрэгтэй тул ЧӨЛӨӨТ ЦАГ танд байвал ХӨДЛӨ, ТОГЛО, АЯЛ, ЗУГААЛ

Эдгээрийг хийгээд дахиад ЧӨЛӨӨТ ЦАГ гаргаад байгаа суут хүн бол ХОББИтай бол. Чөлөөт цагаараа хийдэг ажлыг хобби гэдэг шүү дээ. Бааранд орох, архи уухаас өөр хоббитай бол.

Эх орон таньдаа зориулав-8. Машины зогсоол

Замын бөглөрөл ихтэй яарч сандарсан үед нэгдүгээр эгнээнд зогссон машины номер хурааж байгаа цагдааг хараад магтах янзтай "болж, муусайн юмнууд зам бөглөөд" гэж боддог ч өөрөө зогсоол хайж яваа үед зогсоол байхгүй байж номер хураагаад байхдаа яахав гэж цагдааг муулах янзтай юм бодогдоно.
1990-ээд онд Австрид очиход том дэлгүүрийн доор маш том сайхан зогсоол, орон сууцны доод -1, -2, -3 давхарууд бас зогсоол, бүр том Shopping center-үүдийн гадна маш том зогсоол харагддаг байсан санаанд орж зогсоол хийчихээсэй, бариасай гэж бодогдоно. Зарим газар замын хажууд машинаа зогсоогоод нэг шонгоос цаас аваад явдаг байсан нь одоо бодоход төлбөртэй зогсоол л байж дээ. Тэдгээр зогсоолууд манай задгай зогсоолтой харьцуулах юм биш.

Энэ Shopping center-ийн гадна талын машины зогсоол.
Монголд иймэрхүү хэмжээний зогсоол стадионы
гадна талаар л нэг байгаа юм байна.

Тэгээд гадаадад машины зогсоол одоо ямархуу байдаг юм бол гэж интернетээс car parking гээд хайсан чинь янзтай юмнууд олдож байнаа. Машины зогсоол гэдэг нь бизнес, хотын хөгжлийн бодлогын нэг хэсэг болоод удаж байгаа юм байна.

Энэ 28 давхар зогсоол дээр байгаа машинууд

Энэ нөгөө 28 давхар зогсоол ийм сайхан байшин харагдаж байна.

Ийм зогсоолд машин тавихдаа нэг тавцан дээр машин нь очоод зогсохоор лифтээр өргөөд дээр аваачаад байрлуулдаг, буулгахад мөн л лифтээр буулгаад өгдөг системтэй. Тийм болохоор машинаа ухарааж тавьж байгаад нисчихнэ гэж бодох ч хэрэггүй. Машинаа захад нь тавинаа гарахад хялбар гэж бодох ч хэрэггүй. Цагдаа ирж номер аваад явчихна гэж бодох бүүр ч хэрэггүй болно.

Машины зогсоолын систем.

Хотын төвд машины ийм зогсоол барих газрыг их хурлынхан олгож өгөөд, гадаадаас ерөнхийлөгч, ерөнхий сайд нь мөнгө гуйж ирээд бариулчихаасай. Эсвэл нэг гайгүй мөнгөтэй хүн нь ийм байшин бариад төлбөртэй зогсоол болгоосой. Цагдаа ч амраг. Бид ч амрая.

Эрүүлээр сэтгэ - Соёлын өв

Саяхан Монголын “Монгол тууль”, “Цуурын урлаг”, “Монгол ардын бүжиг-бий, биелгээ”-г ЮНЕСКО-д бүртгэгдэж, баяр болов. Бүртгүүлсэн ангилал нь хамгаалахгүй бол устах гэж байгаа соёлын өв. Хойноос монголын соёл гэж хэлж болохоор бүхнээ бүртгүүлэхээр хөөцөлдөж байна. Огт ойлгогдохгүй юм. Зүйрлэвэл толгойн өвдсөн хүн эмчид очоод өвдөж байгаа болон өвдөхгүй байгаа бүхнээ тоочиж хорт хавдар туссан гэдэг онош тавиулах гэж байгаатай төстэй юм уу хаашаа юм. Энэ нь баярлахаар ч зүйл биш байтал баярлаад л байх юм. Бүх соёлын өв нь хамгаалах шаардлагатай болвол энэ үндэстэн устаж байгаа ангилалд орно. ЮНЕСКО Биет бус соёлын өвийг хамгаалах зорилгоор 2001 онд “Соёлын олон төрөл зүйлийн тухай ЮНЕСКО-гийн түгэмээл тунхаглал”, 2003 онд “Биет бус соёлын өвийг хамгаалах тухай ” конвенци, 2005 онд “Соёлын илэрхийллийн олон төрөл зүйлийг дэмжих тухай” конвенцийг баталсан. Энд бүртгүүлсэнээр ЮНЕСКО ирээд хамгаалаад өгөхгүй, бид хамгаална. ЮНЕСКО-д бүртгэгдсэн соёлын өвийг хадгалж хамгаалах, өв тээгчийг нь дэмжих, энэ соёлын өвийг уламжлуулах зэрэг ажлыг зохион байгуулах үүргийг Засгийн газар нь хүлээдэг. ЮНЕСКО бүртгэж авч байгаа нь биднийг алдаршуулахын тулд биш зөвхөн энд нэг устах гэж байгаа соёлын өв байгаа, эд нар юм хийж байна уу үгүй юу гэдгийг жил бүрийн тайлангаар нь, эсвэл хааяа нэг хүн явуулаад шалгуулна. Манайхан яахав сайхан тайлан явуулчихна. Хүн ирвэл концерт үзүүлээд буцаачихна. Манай дарга нар ЮНЕСКО-д монголын бүх өвийг бүртгүүлсэн гээд сонгуулийн шоу хийнэ. Дүр зураг нь сайхан харагдахгүй л байна. Гэхдээ би буруу бодож, буруу ойлгож байж магадгүй. Тийм л байгаасай.

Эрүүлээр битгий сэтгэ 3. Хямралын эсрэг 2 хуваагдая

Сайн морины таслах, зажлах, залгих гурав зэрэг
Сайн хүний сэтгэх, сурах, хийх гурав зэрэг

3 сарын өмнө хямралын тухай бичихэд ийм юм болохгүй, эдийн засгийг ийм хялбарханаар ойлгож болохгүй гээд шүүмжлүүлж байлаа. Гэтэл тэнд бичсэн зүйлс бүгд таараад байхаар нь үргэлжлэлийг бичиж байна.

Өнгөрсөн оны байдлаар юаны эсрэг доллар унасаар л байж.

Манай төгрөг унаж байгаа мөнгөний эсрэг өссөөр л байсан.

Одоо хямрал болоод байгаа бил үү? Хүндрэл болоод байгаа бил үү?

Гэдэс хямрах гэхээр хоржигнож дуугарах мэтийг хэлдэг. Гэдэсний өвчин хүндэрвэл сур харваж эхлэнэ биз дээ. Гэтэл манай аваргууд хямрал гэвэл арай сэрүүднээ. Хүндрэл гээд нэрлэчихье гээд сууж байдаг. Оноод нэрлэчихсэн ч юм уу

Гадаадынхан хямралын эсрэг хамт тэмцье гэж байх шиг байна. Манай засгийн газар, их хурал цалин хасая, хүү нэмье, зээл өгөхгүй, ажлын байраа хадгалж цалин өг гэх мэтээр хамт хямрая гэж байх шиг байна. Монгол зурагт болохоор дундуур нь Хямралын эсрэг хамтдаа гэж байна.

Миний санал бол тал нь хамтдаа хямрая. Тал нь хамтдаа тэмцье. Бүгдээрээ хамт байх нь 1917-1990 он хүртэл социалист системийн үеийн үзэл. Одоо бид хаашаа явж байгаа нь тодорхойгүй ч тэр үеийн үзэлээс татгалзсан.

Хямрах бүлэгт хүүхдийн 3000 төгрөг өгөх боломжгүй болж байхад түүнээс 300-500 дахин их мөнгө өгчихнөө, мөнгөний уутаа бэлдэж бай гэдэг их хурлынхан. Гадаадын бүх банк хүүгээ буулгаж байхад хүүгээ өсгөж байдаг монголын банк. Улсын 1 жилийн төсөв нь 2 триллион болчихоод байхад гадаадынхан хэзээ өгөх, бүр өгөхгүй байх нь тодорхойгүй байхад 300 сая доллар гадаадаас гуйчихлаа хямрал юухан байхав гэж байгаа засгийн газар. Тэтгэвэрээс өөр орлогогүй хөгшид, хөдөлмөрийн чадваргүй хүмүүс, дээр нь ажил хийх мэдлэг, чадваргүй хүмүүс. Энэ бүлгийн хүмүүст засгийн газар, их хурлынхан туслана биз.

Их хурал, засгийн газар, ерөнхийлөгч шагнал өгөхөө болиоч. Тэрнийг чинь угаах гэж шингэхгүй, зажлагдахгүй юм хэрэглээд хэмнэгдэхгүй байна.

Хямрах бүлгийнхэн хэмнэж, зажлаж, залгиж, шингээж амьдарья.

Тэмцэх бүлэгт ямарч хамаагүй бизнес хийж байгаа хувийн салбарууд. Аль болохоор дампуурахгүйгээр л тэсэж үлдэх. Хямрах бүлгийнхэнд үйлчлэх. Энэ бүлгийн хүмүүст банк туслаад, их хурал, засгийн газар гай болохгүй байхад болно.

Бид насан туршдаа хямрал дунд амьдарсан ч одоо бид сэтгэх, сурах, хийх гуравыг зэрэг хийж байж л хямралаас гарна. Түүнээс биш судлаад, дараа нь сураад, тэгээд боломжтой болж байгаад хийх цаг байхгүй.

Тэмцэх бүлгийнхэн сэтгэж, сурч, хийж амьдарья.

Эх оронч иргэдээ мөнгө хандивлаж хэрэггүй. Тэр мөнгөө хадгалаад гамтай хэрэглэ. Тэгэхгүй бол та өөрөө хямрах бүлэг рүү орно.

Харин хямралаас яаж гарах вэ. Яаж хэмнэж болох вэ гэдэг саналаа сайн хандивла. Тэгвэл та тэмцэх бүлэг рүү орно.

Залуус аа! Англи хэл үзэж байна гээд I am reading. You are writing гээд суулгүй бизнесийн ном уншаад англи хэл, бизнес 2-ийг зэрэг эхэл.

Эрүүл биетэй. Эрүүл бишээр сэтгэе